زوع قلبي زوعة الحر من راس الطويل
نايـفٍ ماربّـه إلا قرانيـس الحـرار
وبري حالي برية العود بالحد الصقيـل
في يد اللي قوّ زنده تقـادح بالشـرار
اتديله واجحد الحزن لا طري الرحيـل
كل ما وادعت بيشه ودمع العين حـار
جعلها لا بكر الوسـم همـال المخيـل
ديرة الشيبان يامـال طـولات العمـار
أشهد إنك يالموادع على قلبـي ثقيـل
غير هذي سنّـة الله ولا منهـا فـرار
كل ما هبت هبوب المفارق يـا خليـل
فاضت العين الشقيه على هـم وقيـار
عبرة في خاطر اللي من الفرقا عليـل
يا وسع عذر المفارق ليا هـل العبـار
هيضتها ليلة السبت وانـوار الجبيـل
واستهاض الفكر بالشعر في تالي النهار
من خفوق يهتوي الجزل ويكب الهزيل
ويتّرفع عن كـلام المطافيـق الصغـار
الأربعاء أكتوبر 24, 2007 11:02 am
